Nú set ég stutta færslu fyrst það er byrjað að kvarta yfir manni.
Ég er kominn með vinnu og byrjaði í henni á mánudaginn síðasta. Starfið er í þjónustuveri Flugfélags Íslands og er þetta alveg ágætis starf. Felst að mestu leyti í því að svara í síma og bóka flug fyrir fólk.
Annars er það helst að frétta af mér að það gekk ekki alveg nógu vel í einu lokaprófinu mínu og þarf ég að fara í upptökupróf á þriðjudaginn. Ég held að það ætti nú ekki að vera mikil hætta á að ég nái því ekki núna en þegar ég tók lokaprófið var þetta próf síðast í röðinni og minni tími til undirbúnings en fyrir hin prófin. Þannig að maður var kominn með svolítið leið á því að vera að læra fyrir prófin og var því kannski ekki jafn duglegur að læra fyrir það eins og maður hefði annars verið. Enda var rúmlega 20% fall í þessu fagi þannig að þetta hefur átt við fleiri en mig.
Við skiluðum af okkur verkefninu um daginn og erum búnir að halda kynningu á því og gekk hún bara nokkuð vel. Nú bíðum við bara eftir einkunn fyrir verkefnið.
Í dag eru bara 23 dagar í Spánarferðina og maður fer nú að hlakka svolítið til
Ég fór á KR-Keflavík á mánudaginn síðasta og það var mjög gaman að sjá Keflvíkinga vinna KR-ingana. Síðan langar mig mjög mikið að skreppa til Keflavíkur á sunnudaginn til að sjá Keflavík-FH. Gæti trúað að það verði helvíti góður leikur. Það kemur bara allt í ljós.
Gott í bili...

Jæja, best að henda inn einni stuttri færslu. Hef ekki verið í neinu bloggstuði upp á síðkastið en set núna inn nokkrar línur. Ég er búinn að fá niðurstöður úr 3 prófum af 4 og er búinn að ná því öllu. Hef ekki náð neinum súpereinkunnum en þó yfir meðaltali í einu faginu. Þó er það mikilvægast að ég hef náð öllum prófunum og þarf því ekki að hafa áhyggjur af endurtektarprófum, allavega ekki enn sem komið er.
Nú er ég búinn að vera á fullu í verkefnavinnu en við erum að fara að skila stóru verkefni eftir helgi og erum við núna á lokasprettinum í því. Þessir síðustu dagar hafa sumir hverjir verið ansi erfiðir og til að mynda mættum við klukkan 9 eða 10 um morguninn einn daginn og fórum ekki heim fyrr en eftir miðnætti þannig að þetta tekur á. En þetta er sem betur fer alveg að verða búið.
Ég er ekki enn kominn með vinnu en það fer vonandi að breytast fljótlega. Í dag eru 5 vikur í Spánarferðina og það er komið smá spenna í mann en þó verður maður að klára þetta verkefni áður en maður getur farið að hlakka mikið til.
En nú styttist í kosningar og ekki möguleiki að láta það fara framhjá sér, svo framarlega að maður sé í einhverju sambandi við umheiminn. Verður gaman að sjá hver niðurstaðan verður og hvort að ríkisstjórnin haldi velli. Fyrir þá sem eru ekki komnir með leið á kosningaumræðunni mega alveg koma með smá innskot í umræðuna hér í kommentum. Fínn staður til að koma með smá áróður fyrir þá örfáu sem líta við á þessari síðu
Hef þetta ekki lengra í bili, vildi bara láta vita af mér...

Nú er sko komið langt síðan ég bloggaði síðast. Páskunum var eytt í Borgarnesi þar sem flestir dagar fóru í afslöppun, heitan pott og að borða góðan mat. Síðan á mánudeginum eftir páska fór ég aftur til Reykjavíkur til að undirbúa mig fyrir próf. Síðan þá hefur mestur minn tími farið í prófundirbúning og nú sér loks fyrir endann á því. Síðasta prófið mitt er á eftir, klukkan 14. Ég tel mig vera búinn að læra ágætlega fyrir það þannig að ég ákvað bara að nota tímann í að henda inn einni færslu.
Ég er búinn að fara í 3 próf. Fór í eitt próf fyrir páska sem gekk ágætlega, eitt á síðasta laugardag sem gekk ekkert spes og síðan eitt á miðvikudag sem gekk nokkuð vel. Þá er bara vonandi að mér gangi ágætlega á eftir
Síðan eftir helgi byrjar vinna í lokaverkefninu í Stefnumótunaráfanganum. Það verður 2 vikna vinna sem endar síðan með kynningu á verkefninu. Ég gæti trúað að það verði ansi mikil vinna í þessu verkefni og maður hafi ekki mikinn tíma til að slappa af næstu 2 vikur. Þess vegna verður helgin notuð fyrir kærkomna hvíld, allavega að hluta til.
Varðandi sumarstarf, þá er ég ekki kominn með vinnu ennþá. Hafði gert mér vonir um að fá starf hjá Glitni en var ekkert farinn að heyra í þeim ennþá þannig að ég hafði samband og þá var mér sagt að fyrst það væri ekki búið að hafa samband ennþá fengi ég líklega ekki vinnu. Honum fannst líklegasta ástæðan vera sú að ég get ekki unnið í tvær vikur í júní þegar ég fer til Spánar. Það þarf alltaf að vera einhver galli við allt. Þetta verður ábyggilega ótrúlega skemmtileg ferð en leiðinlegt að hún skuli hafa áhrif á það hvar ég geti fengið vinnu. En núna er ég allavega að leita að vinnu og búinn að sækja um á nokkrum stöðum og býð bara eftir svörum.
En ég held ég hafi þetta ekki lengra í bili.

Jæja, nú er ansi langt síðan ég bloggaði síðast. Síðan ég bloggaði síðast hefur mestur tími minn farið í lærdóm. Það voru skil á nokkrum verkefnum í síðustu kennsluvikunni og síðan var ég í fyrsta lokaprófinu mínu í gær og gekk það bara ágætlega held ég.
Núna er ég kominn upp í Borgarnes en ég verð hérna framyfir helgi. Ég kom hérna í gær en ég tók strætó upp á Akranes ásamt Jóa. Hann hafði fengið að gista á Reynimelnum í tvær nætur.
Ég fór einmitt með Jóa, Bigga og Kjartani í bíó á laugardaginn á Meet the Robinsons í Kringlubíó þar sem hún er sýnd í þrívídd. Mér fannst þetta skemmtileg mynd og ekki skemmdi fyrir að hafa hana í þrívídd en það var oft á tíðum mjög flott.
Næstu dagar munu líklega einkennast af blöndu af lærdómi og afslöppun. Næsta lokapróf er LAUGARDAGINN 14.apríl... ég er ekki alveg nógu sáttur við það en það verður bara að hafa það. Síðan á milli þess sem maður verður lærandi hérna mun maður skreppa í heita pottinn hérna
En jæja, ætlaði bara að skella inn einhverju smávegis hérna...

Jæja, þá er maður kominn heim frá London og stórskemmtileg ferð að baki.
Ég vaknaði rétt fyrir 5 á miðvikudaginn síðasta og fór niður á BSÍ og tók flugrútuna í Leifsstöð. Klukkan 9 flugum við síðan til London. Ég tók leigubíl á hótelið ásamt þremur öðrum á hótelið og þá keyrðum við meðal annars framhjá hitamæli sem var úti og á honum stóð 22°C. Ég reyndar efast um að það hafi verið alveg svo heitt en það var allavega frábært veður allan tímann nema bara hluta sunnudagsins. Eftir að allir voru búnir að koma sér fyrir á hótelinu fórum við í heimsókn í Baug og þar fengum við smá kynningu og boðið var upp á veitingar. Eftir það kíkti hópurinn síðan aðeins í bæinn og enduðum að setjast við einhver borð í þröngu húsasundi þar sem voru tveir barir sitthvoru megin við húsasundið. Báðir barirnir voru með borð fyrir utan en maður mátti bara sitja við borð þess bars sem maður verslaði við þó það væru bara kannski 2-3 metrar á milli innganganna á staðina.
Fimmtudagurinn var tekinn frekar snemma. Eftir morgunmatinn var underground-ið tekið og farið í höfuðstöðvar Landsbankans í London. Það er óhætt að segja að mín fyrstu kynni af underground-inu hafi ekki verið neitt sérstaklega góð því við vorum á ferðinni þarna rétt fyrir 9 þegar allir voru á leiðinni í vinnuna og því þurfti maður virkilega að TROÐA sér inn í lestina. Þegar í Landsbankann var komið fórum við á námskeið á vegum London stock exchange og eftir það höfðum við smá frjálsan tíma til að rölta um svæðið og ég rölti meðal annars framhjá þessari byggingu

Þessi bygging er kölluð gúrkan af nokkuð augljósum ástæðum, þó einhverjir hafi reyndar viljað líkja þessu við eitthvað annað Eftir þessa stuttu pásu fórum við á kynningu hjá Landsbankanum. Eftir hana fórum við síðan í flottustu kynningu ferðarinnar. Þar fórum við í höfuðstöðvar Lehman brothers í London. Þeir eru staðsettir í 8.hæstu byggingu Lundúna og fór kynningin fram á 31.hæð. Hérna er mynd af byggingunni

Og hérna er útsýnið af 31.hæðinni

og önnur mynd af útsýninu

Móttökurnar sem við fengum þarna voru líka frábærar. Það voru þjónar sem löbbuðu á milli og buðu upp á snittur og fylltu á glös sem voru að tæmast. Eftir þessa kynningu fór ég ásamt nokkrum aðilum á Aberdeen steakhouse þar sem við fengum geðveikt gott nautafillet. Eftir það kíktum við aðeins á einhvern pöbb í hverfinu.

Föstudagurinn var einnig tekinn snemma og var underground-ið tekið í höfuðstöðvar Glitnis í London. Það var líklega óþægilegasta kynningin því þar var ekki boðið upp á sæti og því var maður alveg ónýtur í löppunum eftir þá kynningu. Síðan fórum við í kynningar hjá JP Morgan og Kaupþing og um kvöldið fór allur hópurinn saman út að borða á indverskum stað sem heitir Blue elephant. Þar átti eitt af skemmtilegri atvikum ferðarinnar sér stað. Þegar allir voru búnir að borða koma þjónarnir labbandi inn með einhverja köku á bakka og upp úr henni stendur blys. Þeir labba að einu borðinu, leggja bakkann fyrir framan einn strák og byrja að syngja afmælissönginn fyrir hann. Afmælisbarnið var í hláturskasti á meðan á söngnum stóð. Síðan þegar söngnum var lokið heimtuðu einhverjir ræðu þannig að hann stóð upp og þakkaði fyrir sig en vildi þó sérstaklega þakka þeim sem sat við hlið hans því hann ætti ekki afmæli fyrr en 29.júní. Við þessi orð sprakk salurinn alveg úr hlátri. Þá hafði semsagt vinur hans platað þjónana og sagt að hann ætti afmæli.

Laugardaginn notaði ég í að versla örlítið. Ég byrjaði reyndar á að kíkja í Notting Hill hverfið og kíkja á útimarkað þar. Ég var þar með þremur öðrum strákum en mér tókst að týna þeim þar sem það var alveg ótrúlega mikið af fólki þarna þannig að ég tók bara smá göngutúr um hverfið og tók síðan underground-ið niður á Oxford street og verslaði þar. Síðan um kvöldið fór ég ásamt nokkuð stórum hóp á Planet Hollywood að borða og eftir matinn fengum við smá svæði útaf fyrir okkur og þar var mikið stuð frameftir kvöldi.

Á sunnudeginum ákvað ég síðan að kíkja í smá túristarúnt um borgina. Sá þar meðal annars Big Ben

Fór ásamt fleirum í opinn tveggja hæða strætó sem tekur hring um borgina. Við spurðum hvað tæki langan tíma að fara hringinn og var sagt að þetta tæki um það bil 2 tíma. Eftir 2 tíma vorum við um það bil hálfnuð með hringinn og síðan bilaði strætóinn í þokkabót þannig að við biðum bara eftir næsta strætó og fórum að Buckingham palace, fórum þar út og tókum síðan underground-ið upp á hótel. Síðan var flogið heim klukkan 21:35 um kvöldið og það var óneitanlega nokkuð þægilegt að komast heim og leggjast upp í rúm.

Ótrúlega skemmtileg ferð samt að baki sem verður lengi í minnum höfð.

Jæja, núna eru innan við 12 klukkustundir í brottför til London. Búið að pakka niður í tösku og þá fær maður að sjálfsögðu þessa algengu hugsun: Er ég að gleyma einhverju? ég vona að það sé allt komið í töskuna. Það skiptir allavega mestu máli að gleyma ekki vegabréfinu, flugmiðanum, símanum og veskinu.
Ég verð líklega að fara snemma að sofa í kvöld þar sem ég mun taka flugrútuna klukkan 5:45 í fyrramálið þannig að ég þarf líklega að vakna eitthvað um 5 leytið. Síðan er flugið klukkan 9. Við erum búin að fá afhenda dagskrána sem verður þarna úti og ég held að þetta eigi eftir að vera rosalega skemmtileg ferð.
Núna er ég allavega búinn að skila af mér þeim verkefnum sem voru í gangi fyrir ferðina þannig að núna get ég bara slakað á og hlakkað til fyrramálsins.
En ég held ég fari að kíkja á töskuna mína og athuga hvort ég sé nokkuð að gleyma einhverju. Síðan fer maður bara að telja niður í mínútunum
Læt þetta duga, næsta blogg kemur eftir að ég kem heim að utan...

Búið að vera brjálað að gera í skólanum síðustu vikuna. Var í dag að vinna í tveimur verkefnum í skólanum og var uppí skóla í 7 tíma í verkefnavinnu. Fór síðan beint eftir það á Ölver að fylgjast með mínum mönnum leggja Lille og koma sér með því í 8 liða úrslit Meistaradeildarinnar.
Núna er bara vika í Lundúnaferðina og það er kominn smá spenningur í mann. Verð reyndar að vinna í verkefnum áður en ég fer út þannig að maður má ekki missa sig úr spenningi strax. Það er aðeins byrjað að birta dagskránna þarna úti og við förum í heimsóknir í Glitni, Kaupþing, Landsbankann, Baug, London stock exchange, JP morgan og Lehman brothers. Síðan munum við hafa laugardaginn frjálsan og sunnudaginn líka fram að fluginu þannig að maður ætti að geta fundið sér eitthvað til dundurs. Það eru einhverjir að spá í að fara á fótboltaleik og það væri gaman að fara á leik ef það er ekki uppselt á þá alla.
Annars eru núna bara 2 dagar í árshátíð og ég er búinn að kaupa mér miða á hana. Þetta lítur út fyrir að vera glæsileg árshátíð. Hún er haldin í sal Ferðafélags Íslands í Mörkinni.
Á matseðlinum er:
Forréttur: Nauta-carpaccio með stökku salati og balsamico.
Aðalréttur: Kryddjurtabakað lambaprime með rauðvíns- balsamico sósu.
Eftirréttur: Hvít súkkulaðimús með hindberjasósu og ferskum ávöxtum.
Veislustjóri er Þorsteinn Guðmundsson og Baggalútur spilar fyrir dansi auk þess sem Óli Palli verður DJ.

Ég gæti trúað að þetta verði skemmtilegt kvöld. Hef reyndar ekki hugmynd um hvað allur þessi matur er en þetta hljómar allavega sem eitthvað voðalega fínt.

Annars er voða lítið annað að frétta af mér. Síðustu dagar hafa að mestu farið í verkefnavinnu og næstu dagar munu líka fara í það. Læt þetta duga í bili. En ég reyni að blogga allavega einu sinni í viðbót áður en ég fer út...

Jæja, núna er ég kominn í Borgarnes. Njáll og Heiða höfðu beðið mig að skutla strákunum hingað í pössun því þau eru að fara á árshátíð í kvöld og ég ákvað bara að nýta ferðina og gista eina nótt hérna í Borgarnesi. Núna er ég kominn hingað í Borgarvíkina en mamma og pabbi eru enn að vinna þannig að ég þarf að passa strákana í smá tíma.
Annars er nóg að gera í skólanum þessa dagana í verkefnavinnu og maður er að hitta nokkra mismunandi hópa alla vikuna vegna mismunandi verkefna en þetta reddast allt saman á endanum.
Í gær fór ég í blóðbankann og gaf blóð í fyrsta skipti. Ég hafði farið um daginn í svona skoðun hjá þeim þar sem blóðsýni voru tekin og í gær fór ég að gefa í fyrsta skipti. Ég bjóst við að þetta yrði aðeins meira mál en þetta var þar sem það er næstum hálfur líter sem er gefið. En mér fannst þetta nú ekki mikið mál og bara gaman að vita til þess að maður sé kannski að hjálpa einhverjum með þessu. Ég komst að því í þessari ferið að ég er í blóðflokknum O- sem þýðir að allir geta þegið blóðið úr mér þannig að ég gæti verið að hjálpa einhverju ykkar í hvert skipti sem ég gef blóð
Annars mæli ég bara með því að allir fari að gefa blóð og geri þannig góðverk. Síðan er ekki verra að það er náttúrulega boðið upp á veitingar þegar maður er búinn að gefa.
Núna styttist í Lundúnaferð og í dag eru bara 12 dagar í ferðina. Síðan er ég líka að fara á árshátíð hjá viðskiptaráði HR næsta föstudag þannig að það er nóg um að vera í skólanum og ekki bara í verkefnavinnu
En ég held ég hafi þetta ekki lengra í bili. Vona að sem flestir kommenti og svo vona ég að allir fari að gefa blóð

Það kom á daginn að ég hafði rétt fyrir mér varðandi Eurovision og Eiríkur Hauksson verður fulltrúi Íslendinga í Helsinki 12.maí. Ég er mjög sáttur með þá niðurstöðu og nú er bara að vona að hann standi sig vel úti.
Mál málanna þessa dagana virðist vera þessi klámráðstefna sem halda á hér á landi. Ég skil ekki alveg hvað þeir sem eru á móti þessu vilja að gert verði. Það er fólk að koma til landsins sem vinnur við vinnu sem er lögleg í þeirra heimalandi. Það kemur til landsins til þess að gera hluti sem eru löglegir hér á landi, því síðast þegar ég vissi var ekkert sem bannaði ráðstefnur eða fundarhald hér á landi. Samkv. þessu er engin ástæða til að banna þessu fólki að koma til landsins og það væri í raun bara fáránlegt að gera það.
Um helgina kíkti ég aðeins á djammið með Kjartani, Friðgeiri, Finni, Bigga og Bigga. Við horfðum fyrst á Eurovision og kíktum síðan á Cafe Rosenberg þar sem Ljótu hálfvitarnir voru að spila. Það var ágætis skemmtun, en eftir að hafa verið þar í ágætis tíma kíktum við á NASA þar sem Páll Óskar var að "þeyta skífum". Það var svaka stuð þar og mikil stemning, sérstaklega þegar Mihai Treisterio(hef ekki hugmynd um hvernig á að skrifa þetta), sem söng Tornero í Eurovision í fyrra fyrir hönd Rúmena, og Eiríkur Hauks komu og sungu.
Núna á föstudaginn er ég á leiðinni í mína aðra húðslípun og ég er svona að skoða þann möguleika að skreppa upp í Borgarnes einhvern tímann á föstudag, það fer reyndar mikið eftir því hvernig staðan verður á verkefnavinnu um helgina. Það er nóg af verkefnum í gangi þessa dagana og því óvíst hvort ég geti farið úr bænum. Það kemur allt í ljós.
Ég held ég skrifi ekkert meira í bili...
3 vikur í London

Á laugardaginn síðasta fór ég á þorrablót með Njáli á Hellu. Við fórum austur fljótlega eftir hádegi á laugardeginum og þegar við komum í bæinn byrjuðum við á því að taka smá rúnt um bæinn þar sem ég hef ekki oft komið til Hellu síðan ég flutti þaðan. Síðan um kvöldið var komið að þorrablótinu. Það var ágætis skemmtun, reyndar þekkti ég nánast engan þarna en þó hitti ég einhverja sem ég kannaðist við. Síðan voru skemmtiatriði þarna og húmorinn sem var í gangi þar var ansi staðbundinn(held að þetta sé rétta orðið yfir það) og því hafði ég ekkert sérstaklega gaman að þeim þó svo að salurinn væri skellihlæjandi.
Í vikunni skráði ég mig í Lundúnaferðina sem farin verður með skólanum eftir mánuð. Ég vona að þetta eigi eftir að verða skemmtileg ferð, allavega er ég farinn að hlakka talsvert til.
Síðan komst ég að því í vikunni að það væri kominn heitur pottur í Borgarnesið. Það er greinilega ekki alveg nógu öflugt samskiptakerfið í fjölskyldunni því ég las þessar fréttir bara á bloggsíðunni hjá pabba Ég vissi reyndar að mamma og pabbi voru búin að vera að spá í að kaupa pott. En það er allavega ljóst að maður tekur með sér sundföt í næstu ferð upp í Borgarnes.
Þessa helgi er kennsla í vörustjórnun hjá mér sem þýðir að bæði föstudag og laugardag fer í skólann frá klukkan 9-ca.15. Það er alveg ótrúlega gaman að fara í skólann á laugardagsmorgni, eða þannig. Þetta þýðir að maður má víst ekki fara seint að sofa á morgun, en samt er ég að spá hvort ég ætti að reyna að sjá x-factor einhversstaðar, það kemur líklega bara í ljós í dag.
Síðan á laugardaginn er náttúrulega úrslitakvöldið í Eurovision og þá kemur í ljós hvort spádómurinn minn sé réttur. Ég stend allavega fastur á því ennþá að Eiríkur fari áfram. Endilega allir sem ekki hafa tekið þátt í könnuninni að drífa í því.

Jæja, held ég láti þetta nægja í bili.